主页 > 关于生物 >希望家己的未来亲像浮出来的日头:我欲做好囝 >
2020-07-08

希望家己的未来亲像浮出来的日头:我欲做好囝

希望家己的未来亲像浮出来的日头:我欲做好囝

大雨落甲 phik-phe̍h 叫,雷公霆甲 khinn-khenn 叫,阿蕊仔伫高速公路驶车,虽罔雨遐尔大,虽罔雷公烁爁予伊诚惊惶,毋过,想着阿雄仔这个后生,伊就啥幺拢毋惊,一直勇敢向前行。

坐伫车内的阿雄仔看雨捽仔捽甲雄戒戒 ,外口嘛是雾嗄嗄。伊想起过去、想着未来,希望这阵大雨会当共过去的种种洗予清气,希望未来—希望未来莫予阿母操心。阿雄仔有几若摆一直想欲看车窗仔外口,毋过一直看袂出去,毋知家己的未来伫佗位,敢会像车窗仔外口遐尔雾?

希望家己的未来亲像浮出来的日头:我欲做好囝

想着昨下昏暗假释转来到厝,阿母看着伊转来欢喜甲目屎含目墘,阁一直讲转来就好、转来就好!叫伊迒过烘炉火了后,随捀一碗猪跤麵线予伊食,绁落伊去公妈厅,先点三欉香共祖先稟报阿雄仔这个孙仔转来矣,阁叫阿雄仔跪落来共祖先忏悔……,种种的动作,毋知已经做过几摆啰!「希望这是上落尾的一摆」,阿雄仔伫心内共家己按呢讲。

车驶落苗栗的交流道了后,一下仔就开始 peh 山,后来宽宽仔盘山,愈 peh 愈悬,这阵,雨沓沓仔较细,来到山顶尾溜的时,雨拄拄好停矣!母仔囝两人坐车坐几若点钟,毋但真忝头,心肝内嘛乱操操。毋过落车的时,欶一喙新鲜的空气,跤仔手伸匀一下,煞看着目睭前是一大片开阔、清幽的山坪,阁有青翠、优美的景緻,两人拢诚欢喜,原来遮就是『晨曦会』。阿雄仔敢若看着拄浮出来的日头,嘛看着希望、看着未来。

希望家己的未来亲像浮出来的日头:我欲做好囝

辅导老师笑头笑面请in入去会客室坐,阁倒茶请in啉。「老师拜託咧,阿雄仔后摆就望老师共伊牵教啰!」「这请你放心免烦恼!」李老师讲解『晨曦会』的同学一工的活动,随后就in伫会内四界行行看看咧阁做导览。

行来到桥顶的时,桥跤有鸭咪仔伫水里自由自在泅过来泅过去,阿雄仔跤步就按呢停落来,诚细声讲一句「希望我后摆会当像鸭咪仔遐尔仔逍遥快乐」,行做前的老师佮阿蕊仔越头过来,阿蕊仔讲:「阿雄仔行较紧咧喔!」阿雄仔出力共鞋仔底的细粒石头仔倒倒、敲敲出来,

本文摘自《真情99》一书。

希望家己的未来亲像浮出来的日头:我欲做好囝真情99
    作者:韩满出版社:2019/04/24出版日期:前卫出版社读册生活购书